Mësimdhënës të shkollës, universitetit të Prishtinës, prindër e nxënës u mblodhën këtë të premte në Gjimnazin e Specializuar Matematikor.
Nën intonimin e himnit shtetëror e atij kombëtar nisi edhe shënimi i ditës së shkollës e ditës së numrit Pi.
Para të pranishmëve foli drejtoresha e këtij gjimnazi, Fahrije Latifi Retkoceri, e cila përmendi sfidat e sukseset gjatë rrugëtimit 11 vjeçar të kësaj shkolle.
“Ky përvjetor i shkollës që do të thotë 11 vjetori nuk është thjeshtë një numër por një dëshmi e rrugëtimit, një histori e mbushur me përpjekje sfida e suksese të jashtëzakonshme, ku gjatë këtyre viteve kemi dëshmuar se talenti dhe përkushtimi janë forca shtytëse e këtij institucioni”, tha ajo.
E ditën e hapjes së shkollës e kujton shumë mirë edhe profesor Muhib Lohaj.
“Themeluam gjimnazin e specializuar matematikor, qëllim parësor kishim mbështetjen e zhvillimit e të përparimit të matematikës. Në realizimin e këtij qëllimi përpos angazhimit të profesorëve të departamentit të matematikës, në mësimdhënie ka qenë edhe një angazhim i vazhdueshëm i tyre përmes shoqatës se matematicentëve”, tregoi Lohaj.
Se matematika nuk ka qenë lënda e tij e preferuar e tha ish komandanti i UÇK-së, Hisen Berisha i cili këtu ishte i thirrur si përfaqësues i kryesisë së prindërve.
Mirëpo ai ndau një histori gjatë luftës kur e kishte kuptuar rëndësinë e kësaj shkence.
“Kjo PI-ja ma ka hangër shpirtin, por du me tregu pse masanej e kam vlerësuar se matematika nuk është vetëm një lëndë. Matematikën e kam kuptuar që është më e rëndësishmja gjatë luftës, na sollën një top të madh që godiste në 22 kilometra, as nuk e shifshim objektivin, veç na tregoi Ramush Haradinaj që tek shkolla në Beleg prej Kosharës”, tregoi Berisha.
Mes tjerash, nxënësit prezantuan edhe eksperimentet kimike që kishin përgatitur.
Gjatë ceremonisë u ndanë mirënjohje mësimdhënësve, nxënëseve si dhe një mirënjohje për punën iu dhurua edhe drejtoreshës së gjimnazit.
Ceremonia përfundoi me disa pika artistike.
