Kuvendi Komunal i Gjilanit miratoi sot me 24 vota buxhetin për vitin 2027, prej rreth 43,6 milionë eurosh. Sipas komunës, buxheti është 1.6 milion euro më i lartë se ai i vitit paraprak. Kuvendarët miratuan edhe vlerësimet e hershme për vitet 2028 dhe 2029.
Para shqyrtimit të buxhetit, Kuvendi miratoi unanimisht një deklaratë kundër aktgjykimit të Dhomave të Specializuara në Hagë. Deklarata u propozua nga Bujar Nevzati i PDK-së dhe u mbështet nga të gjitha grupet e këshilltarëve komunalë.
“Për Gjilanin, kjo çështje ka peshë të veçantë, pasi gjatë luftës në Kosovë humbën jetën 98 civilë dhe ranë 50 dëshmorë, ndërsa shumë familje dhe fshatra u përballën me shkatërrim dhe djegie të tërësishme nga forcat serbe”, tha kryesuesja e Kuvendit, Krenare Latifi-Kqiku.
Në të njëjtën seancë u miratua Strategjia për Zhvillim Ekonomik Lokal 2026–2031. Kuvendarët miratuan edhe kërkesën për heqjen e taksës komunale për bizneset për vitet 2000–2026.
Mes vendimeve të tjera janë dhënia në shfrytëzim afatgjatë e pronave komunale me kompensim në ndërtim dhe ndarja e 2 hektarëve tokë për muzeun “Agim Ramadani” në Zhegër.
Kuvendi miratoi gjithashtu propozimet që neurokirurgu Mentor Petrela dhe veprimtari Muharrem Aliu, ky i fundit pas vdekjes, të shpallen Qytetarë Nderi të Gjilanit.
