Komuna e Gjilanit ka caktuar lokacionin e ri të varrezave. Ai do të jetë në fshatin Shillovë, një fshat i banuar me shumicë serbe.
Ekipi i tëvë1 ka tentuar të marrë qëndrime edhe nga banorët e fshatit Shillovë, i banuar kryesisht me komunitet serb për të parë se si e shohin ata këtë vendim të komunës, por ata nuk kanë pranuar të flasin para kamerës për këtë çështje.
E drejtori për Gjeodezi dhe Kadastër në komunën e Gjilanit Bekim Salihu, ka treguar se pse është përzgjedhur pikërisht kjo sipërfaqe tokësore në këtë fshat.
“Në kuadër të kësaj zgjedhjeje janë bërë analiza të dhënave hapësinore përmes stafit dhe softuerave adekuatë që përdoren për analizat e të dhënave gjeo-hapësinore dhe ku janë marrë parasysh shumë parametra siç është afërsia, qasja në rrugë, hapësira dhe kemi ardhur në përfundim që ky është lokacioni më i përshtatshëm për varrezat e qyteti, meqë është edhe pronë publike duke i marrë parasysh problemet që i ka komuna jonë me shpronësimet”, ka thënë ai.
Përkundër nevojës për një lokacion të ri të varrezave që ka Gjilani, për opozitën, vendi i përzgjedhur nuk është i duhuri.
“Në atë parcelë është e paraparë, që të ndërtohet një zonë industriale, një zonë ekonomike për qytetin e Gjilanit. Në një zonë ekonomike ku pretendohet të ketë zhvillim ekonomik të qytetit të Gjilanit, duke qenë Gjilani si qendër afër kufirit me Maqedoninë me Serbinë një qendër ekonomike shndërrohet në varrezë ashtu siç mund të them se edhe vet Gjilani është shndërruar në një varrezë të madhe”, ka thënë Avdyl Aliu, nga LDK.
E kryetari i Komunës së Gjilanit Alban Hyseni tha në seancën fundit komunale, se me lokacionin e ri të varrezave, Gjilani po bën zgjidhje të problemit për 100 vitet e ardhshme.
Kronika e realizuar nga gazetarja Riga Gjata
