Pas qëndrimit prej 15 ditësh në Bansko të Bullgarisë, skuadra e Gjilanit, të enjten ka mbajtur seancën e fundit stërvitore përpara nisjes për në Kosovë.
Në njoftimin e klubit nga Superliga, thuhet se “kjo periudhë përgatitore është shfrytëzuar maksimalisht nga stafi teknik dhe lojtarët për të rritur ngarkesën fizike dhe për të testuar elemente të reja në të gjitha repartet”.
Gjatë qëndrimit në Bullgari, Gjilani i ka zhvilluar edhe katër ndeshje miqësore, ku ka regjistruar tri humbje dhe një barazim.
Pas kthimit në Kosovë, Gjilani do të ketë një pushim të shkurtër, përpara se të vazhdojë me stërvitjet para fillimit të sezonit 2025/26 në Superligë.
Në xhiron e parë të elitës së futbollit kosovar, Gjilani e pret në shtëpi Ballkanin, ndeshje kjo që luhet më 16 gusht prej orës 15:00.
