Çdo lojtari të Man.United i janë ndarë vetëm dy bileta, ndërsa shpenzimet e udhëtimit për familjen dhe miqtë nuk do të mbulohen.
Manchester United do të luajë finalen e Europa League më 21 maj, kundër Tottenham, në “derbin” tërësisht anglez të planifikuar për në San Mamés, Bilbao.
Megjithatë, për këtë rast, Ruben Amorim, trajneri i “Djajve të Kuq”, donte t’u bënte një dhuratë 30 anëtarëve të stafit teknik: ai e pagoi udhëtimin nga xhepi i tij.
Lajmi, i raportuar për herë të parë nga ESPN, pretendon se trajneri portugez donte të sigurohej që punonjësit e tij të mund të sillnin familjet e tyre në Spanjë, pasi klubi e informoi atë se trajnerët, fizioterapistët dhe anëtarët e tjerë të ekipit mbështetës do të duhej të blinin bileta me shpenzimet e tyre.
Drejtuesit e United po ecin përpara me një sërë masash për uljen e kostove, duke përfshirë shkurtimin e rreth 200 vendeve të punës në Old Trafford këtë verë dhe duke vënë në dispozicion vetëm dy bileta për punonjës për t’u blerë në vend që të financojë udhëtimin falas për në finale.
Kuptohet që United e ka marrë këtë vendim për t’u siguruar që tifozët të mund të blejnë sa më shumë bileta të jetë e mundur, të cilat klubi i ka ndarë nga kuota prej 15.000 biletash për finalen. Çdo lojtari i janë ndarë vetëm dy bileta, ndërsa shpenzimet e udhëtimit për familjen dhe miqtë nuk do të mbulohen.
Këtu Amorim ka vendosur të ndërhyjë personalisht dhe të mbulojë shpenzimet për ekipin e tij të United, si një gjest mirënjohjeje për kontributin dhe angazhimin e tyre gjatë gjashtë muajve të vështirë në hijen e Old Trafford.
