Gjermania po vazhdon që të jetë vendi më i preferuar për kosovarët për të jetuar dhe punuar.
Kështu të paktën bëjnë të ditur nga Ambasada Gjermane në Prishtinë, ku thuhet se në vitin 2022 kanë qenë një nga ambasadat që ka lëshuar më së shumti viza në mbarë botën.
Në një përgjigje për teve1.info thuhet se gjatë vitit që lamë pas janë lëshuar 73 mijë e 686 viza.
Nga kjo shifër 9 mijë e 309 janë viza punë(përfshirë viza për shkencëtarë, trajnime profesionale, praktika, punë vullnetare).
“Në vitin 2022, Ambasada gjermane i ka lëshuar 48,937 viza Shengen për nënshtetas të Kosovës, të cilët dëshirojnë të qëndrojnë në Gjermani përkohësisht me qëllim të turizmit, afarizmit etj, dhe 17.479 viza nacionale, ndër to 9.309 viza pune (përfshirë viza për shkencëtarë, trajnime profesionale, praktika, punë vullnetare)”, thuhet në përgjigje.
Ndryshe, redaksia ka drejtuar pyetje në lidhje edhe më profesionet që më tepër janë duke marrë viza në këtë ambasadë, por të njëjtit nuk janë përgjigjur.
Ambasada Gjermane në Prishtinë ndër vitet e ka dhënë këtë numër të vizave për kosovaret.
Brenda vitit 2021, Ambasada Gjermane në Prishtinë ka lëshuar gjithsej 34 mijë viza të të gjitha kategorive, nga të cilat 4 mijë e 442 ishin viza pune.
Edhe në vitin 2020, Ambasada Gjermane kishte lëshuar rreth 18 mijë viza, 8 mijë afatshkurta dhe 10 mijë afatgjata, 1 mijë e 671 viza punë, edhe 8 mijë e 329 viza kanë qenë për bashkim familjar dhe viza studentore.
Para pandemisë, në vitin 2019 Ambasada Gjermane në Prishtinë, ka lëshuar më shumë se 50 mijë viza.
Prej tyre rreth 36 mijë viza kanë qenë për qëndrime afatshkurtër, si dhe rreth 15 mijë viza nacionale për qëndrime afatgjata, 5 mijë 772 viza pune dhe 9 mijë e 228 viza për bashkim familjar, si dhe viza studimi.
