Kryenegociatori i Republikës së Kosovës me Bashkimin Evropian, Jeton Zulfaj, ka pritur në takim shefin e Bashkëpunimit për Zhvillim në Ambasadën e Gjermanisë në Kosovë, Daniel Alker, dhe drejtorin e GIZ-it për Kosovën dhe Maqedoninë e Veriut, Marcus Delf.
Takimi është zhvilluar në kuadër të takimeve me partnerët zhvillimorë, ndërsa në fokus ka qenë mbështetja e Gjermanisë për institucionet e Kosovës dhe procesi i integrimit evropian.
Zulfaj ka falënderuar përfaqësuesit gjermanë për përkrahjen e vazhdueshme që Gjermania i ka dhënë dhe vazhdon t’u japë institucioneve të Kosovës.
Sipas tij, Kosova po vazhdon me përgatitjet e hershme institucionale në fushën e integrimit në Bashkimin Evropian, me synimin për të rritur efikasitetin administrativ dhe për të krijuar kapacitetet e nevojshme për fillimin e negociatave për anëtarësim.
Në takim është vlerësuar edhe rëndësia e ndihmës zhvillimore për Kosovën.
“Gjermania vazhdon të jetë ndër kontribuuesit kryesorë në fushën e bashkëpunimit dhe zhvillimit në Kosovë”, theksohet në fund të njoftimit./teve1.info/
