Qeveria gjermane ka ndaluar grupin ekstremist të djathtë “Qytetarët e Rajhut”, që e quan veten “Mbretëria e Gjermanisë”, i cili refuzon të pranojë shtetin gjerman dhe pretendon se Gjermania është ende një “Mbretëri”.
Autoritetet arrestuan katër udhëheqës të grupit, ndër të cilët edhe liderin Peter Fitzek, i cili shpalli “Mbretërinë e Gjermanisë” në vitin 2012.
Që nga e hëna, rreth 800 oficerë policie kanë kontrolluar pronat e grupit dhe shtëpitë e anëtarëve të tij kryesorë. Ministri i Brendshëm, Alexander Dobrindt, tha se grupi ka krijuar struktura kriminale dhe mbështet teza konspirative antisemite.
Ai theksoi se Gjermania do të veprojë fuqishëm kundër këtyre grupeve që kërcënojnë rendin demokratik të vendit, raporton AP.
Grupi, i njohur edhe si Reichsbürger, refuzon të njohë ligjet dhe institucionet gjermane, duke mos paguar taksa dhe sigurime shoqërore.
Sipas Dobrindt, ky grup përbën një kërcënim për sigurinë kombëtare dhe do të ndalohen platformat e tij online dhe do të konfiskohen asetet financiare.
Ky nuk është rasti i parë që Gjermania ndërmerr masa kundër lëvizjes Reichsbürger. Në vitin 2023, autoritetet bastisën shtëpitë e disa anëtarëve të grupit, dhe vitin e kaluar, udhëheqësit e një komploti të dyshuar për rrëzimin e qeverisë gjermane u futën në gjyq.
