Kancelari gjerman, Friedrich Merz ka premtuar mbështetje të drejtpërdrejtë për zhvillimin e sistemeve të raketave me rreze të gjatë veprimi të Ukrainës, duke theksuar se këto armë nuk do të jenë subjekt i kufizimeve të vendosura më parë nga aleatët perëndimorë.
Deklarata e tij erdhi gjatë një konference për shtyp në Berlin, ku Merz qëndronte krah për krah me Presidentin ukrainas, Volodymyr Zelenskyy, i cili ndodhet për një vizitë zyrtare në Gjermani.
“Ukraina do të jetë në gjendje të mbrohet plotësisht, duke përfshirë edhe kundër objektivave ushtarake jashtë territorit të saj,” deklaroi Merz, duke sinjalizuar një ndryshim të madh në politikën e ndihmës ushtarake.
Sipas marrëveshjes së re të bashkëpunimit, Gjermania do të ndihmojë në përmirësimin e kapaciteteve të prodhimit të brendshëm të raketave në Ukrainë, duke i dhënë Kievit më shumë kontroll dhe pavarësi në luftën e tij trevjeçare kundër pushtimit rus.
Merz e përshkroi këtë hap si një pjesë të përpjekjes për të pajisur ushtrinë ukrainase me “të gjitha aftësitë që i mundësojnë asaj të mbrojë me sukses vendin”.
Gjermania është furnizuesi i dytë më i madh i ndihmës ushtarake për Ukrainën, pas Shteteve të Bashkuara, dhe ky zhvillim pritet të thellojë rolin e saj në mbështetjen e rezistencës ukrainase.
Ndërkohë, disa orë pas deklaratës së Merz, Ministri i Jashtëm rus Sergey Lavrov bëri një thirrje publike për rifillimin e bisedimeve të drejtpërdrejta të paqes mes Rusisë dhe Ukrainës. Ai propozoi që raundi i ri i negociatave të mbahet më 2 qershor në Stamboll, ka raportuar AP.
Në një mesazh video, Lavrov tha se Rusia do të paraqesë një memorandum që shpalos pozicionin e saj për të “kapërcyer në mënyrë të besueshme shkaqet rrënjësore të krizës”. Ai konfirmoi gjithashtu se delegacioni rus do të udhëhiqet sërish nga ndihmësi presidencial Vladimir Medinsky.
“Shpresojmë që të gjithë ata që janë sinqerisht të interesuar për suksesin e procesit të paqes, më shumë sesa vetëm me fjalë, do të mbështesin një raund të ri negociatash të drejtpërdrejta ruso-ukrainase në Stamboll,” tha Lavrov.
Në përgjigje, Ministri ukrainas i Mbrojtjes, Rustem Umerov, u shpreh se Ukraina nuk është kundër bisedimeve të drejtpërdrejta, por theksoi se ende nuk ka parë memorandumin rus dhe paralajmëroi se çdo takim pa një dokument të tillë do të ishte “boshe”.
