Ministri i Shtetit i Gjermanisë, Gunther Krichbaum, ka takuar emisarin e Bashkimit Evropian për dialogun Peter Sorensen, në Berlin, ku ka potencuar nevojën e zbatimit të marrëveshjeve për normalizimin e marrëdhënieve midis Kosovës dhe Serbisë.
Sipas një komunikate të lëshuar nga Zyra Federale e Jashtme, Krichbaum ka takuar Sorensenin më datë 29 korrik, ku ka ritheksuar mbështetjen e qeverisë së tij për dialogun e lehtësuar nga BE-ja si dhe përpjekjet e Sorensen në këtë drejtim.
Po ashtu, theksohet se Gjermania është e gatshme të mbështesë të dy vendet në avancimin e një procesi të qëndrueshëm, gjithëpërfshirës dhe paqësor të normalizimit.
“Qeveria Gjermane mbështet plotësisht dialogun e lehtësuar nga BE-ja për normalizimin e marrëdhënieve ndërmjet Serbisë dhe Kosovës. Unë përgëzoj plotësisht përpjekjet e Peter Sorensen. Ne i bëjmë thirrje Qeverive të Kosovës dhe Serbisë që të zbatojnë të gjitha marrëveshjet e arritura pa vonesa të mëtejshme, të heqin dorë nga çdo deklaratë apo veprim që mund të shkaktojë përshkallëzim. I bëj thirrje të dy vendeve që të rifillojnë angazhimin e tyre të plotë në procesin e dialogut. Kjo përfshin mundësimin e lëvizjes së lirë dhe të sigurt, edhe për negociatorët dhe ekipet e tyre, si dhe moderim kritik në deklaratat publike duke pasur parasysh mandatin e tyre përkatës. Gjermania është e gatshme të mbështesë të dy vendet në avancimin e një procesi të qëndrueshëm, gjithëpërfshirës dhe paqësor të normalizimit. Ne e shohim të ardhmen e Ballkanit Perëndimor brenda Bashkimit Evropian. Normalizimi i marrëdhënieve ndërmjet Kosovës dhe Serbisë është thelbësor në këtë kontekst,” thuhet në komunikatë.
Krahas kësaj, potencohet se Gjermania është duke monitoruar nga afër arrestimin e ish-policit të Kosovës Arbnor Spahiu nga Beogradi zyrtar dhe arrestimin e Igor Popoviq të së ashtuquajturës zyrë serbe për Kosovën, nga Prishtina zyrtare.
Për Spahiun, ministri gjerman kërkoi edhe zbatimin e marrëveshjeve të Brukselit, sipas të cilave veprat penale që kryhen në Kosovë procedurat ligjore duhet të zhvillohen në Kosovë.
Spahiu u arrestua nga autoritetet në Beograd në fillim të muajit qershor, i cili “dyshohet për vrasje të rëndë” në sulmin terrorist serb në Banjskë në vitin 2023.
Gjatë sulmit terrorist serb është vrarë rreshteri Afrim Bunjaku, ndërsa në përleshjet me armë janë vrarë edhe tre sulmues serbë.
“Dialogu dhe marrëdhëniet e mira fqinjësore janë shtylla e një Bashkimi Evropian të fortë. Në këtë frymë, ne vazhdojmë të monitorojmë me kujdes arrestimin e fundit të zëvendësdrejtorit serb Igor Popoviq në Kosovë. Çdo masë e privimit të lirisë duhet të jetë e justifikuar dhe proporcionale. Gjithashtu, ne po monitorojmë me kujdes arrestimin e qytetarit kosovar Arbnor Spahiu nga autoritetet serbe dhe presim që Serbia të sigurojë plotësisht dhe shpejt zbatimin e procedurave ligjore, të respektojë të drejtat themelore dhe të garantojë një proces të drejtë ligjor – në përputhje me marrëveshjen e dialogut për drejtësinë që përcakton se procedurat penale për vepra në Kosovë duhet të zhvillohen në parim në Kosovë. I kujtoj të gjithë aktorët e përfshirë, si në Kosovë ashtu edhe në Serbi, se respektimi i standardeve dhe vlerave themelore evropiane, në veçanti sundimi i ligjit, është jetik për procesin e anëtarësimit në BE,” përfundon komunikata.
Kosova dhe Serbia kanë ngecur në zbatimin e marrëveshjes bazë të Brukselit dhe Aneksit të Ohrit të arritur në vitin 2023.
Pala kosovare akuzon Serbinë për tërheqje nga kjo marrëveshje kur në fund të vitit 2023 i ka dërguar letër Brukselit zyrtarë se nuk do të zbatojnë nene të caktuara të marrëveshjes, të cilat sipas institucioneve vendore ishin njohje de-facto e Serbisë ndaj Kosovës.
