Në qytezën e vogël të quajtur Srebrenicë, 29 vjet më parë u kryen ndër krimet më mizore që nga përfundimi i Luftës së Dytë Botërore.
Forcat serbe nën udhëheqjen e gjeneralit Ratko Mlladiq, vranë mbi 8.000 burra dhe djem myslimanë.
Këto vrasje u vlerësuan si gjenocid nga Gjykata Ndërkombëtare e Drejtësisë në Hagë.
E pavarësisht pse këto krime kundër njerëzimit janë mirë të dokumentuara, krerët shtetëror serb e mohojnë faktin se në Srebrenicë është kryer gjenocid.
Përveç mohimit të gjenocidit, kriminelët e luftës vazhdojnë të glorifikohen nga udhëheqësit politik në Serbi.
Ish-deputeti në Kuvendin e Serbisë, Aleksandar Olenik, thotë për Tëvë1 se gjenocidin në Serbi po e mohojnë ata që janë vetë përgjegjës për këto krime, e këtu ai përmend edhe disa emra.
“Duhet të them që mohimi i gjenocidit dhe tentimi për ndalimin e rezolutës është tentim i atyre të cilët personalisht janë më përgjegjësit për gjenocid. Ekziston edhe politika nacionaliste të cilën e kanë ndjekur Millosheviçi, Shesheli, Vuçiqi, Daçiçi, dhe tjerët, dhe ata bartin përgjegjësinë politike për gjenocid. Tani këta persona synojnë përmes propagandës që bëjnë ta mbrojnë veten e tyre. Duke qenë pjesë e qeverisjes së Millosheviçit, duke krijuar atë qeveri, kanë mundësuar gjenocidin, dhe unë i shoh personalisht përgjegjës”, thotë ish-deputeti serb.
Kurse, analisti politik, Belgzim Kamberi, thotë se Serbia vazhdon të jetë revizioniste në raport me historinë.
“Kjo rezolutë është e rëndësishme për çështjen e raportit me të kaluarën dhe raportin me gjenocidin dhe krimet e luftës. Unë konsideroj që në këtë drejtim Serbia vazhdon të jetë revizioniste në raport me historinë”, thotë Kamberi.
`
Tutje, Kamberi thotë se klasa aktuale politike në Serbi është vazhdimësi e asaj klase politike të viteve të 90-ta.
“Kjo klasë politike në Serbi është vazhdimësi e asaj të viteve të 90-ta. Pra, kemi kryesisht kuadro të partisë së Sllobodan Millosheviqit dhe partisë së Sheshelit të cilët njëfarë mënyre vetëm e kanë ndryshuar setrën. Këta politikanë brenda natës janë bërë kinse perëndimorë, por ata si historik vijnë nga qarqet ultra nacionaliste”, shprehet ai.
Presidenti i parë i Republikës Sërpska, Radovan Karaxhiq dhe Komandanti i ushtrisë së Republikës Sërpska në atë kohë, Ratlko Mlladiq, po vuajnë dënim të përjetshëm për gjenocid.
