Komandanti i KFOR-it, gjeneral major Enrico Barduani, ka pritur të martën në selinë e këtij misioni në Kosovë emisaren e posaçme të Britanisë së Madhe për Ballkanin Perëndimor, Karen Pierce.
Sipas njoftimit zyrtar të KFOR-it, gjatë takimit është diskutuar situata aktuale e sigurisë në Kosovë, si dhe procesi i dialogut ndërmjet Kosovës dhe Serbisë, i ndërmjetësuar nga Bashkimi Evropian.
“Takimi u fokusua kryesisht në situatën aktuale të sigurisë në Kosovë dhe në dialogun Beograd–Prishtinë të lehtësuar nga BE-ja. Në këtë kontekst, Gjeneral Major Barduani ritheksoi përkushtimin e vazhdueshëm të KFOR-it për një ambient të sigurt dhe të qetë për të gjitha komunitetet”, thuhet në komunikatë.
Gjeneral Barduani gjithashtu ka vlerësuar lartë angazhimin e kontingjentit britanik në kuadër të KFOR-it, duke shprehur mirënjohje për kontributin e vazhdueshëm të Mbretërisë së Bashkuar për paqen dhe stabilitetin në rajon.
Nga ana e saj, emisaria Karen Pierce ka falënderuar KFOR-in për përpjekjet e tij të vazhdueshme në ruajtjen e sigurisë dhe mbështetjen e stabilitetit për të gjitha komunitetet në Kosovë.
