Komandanti i Forcës së Sigurisë së Kosovës (FSK), gjenerallejtënant Bashkim Jashari, me ftesë të Komandantit Suprem të Forcave Aleate në Evropë (SACEUR) dhe Komandantit të Komandës Evropiane të Shteteve të Bashkuara (EUCOM), gjeneral Alexus G. Grynkewich, mori pjesë në ceremoninë e ndërrimit të komandantit të Ushtrisë Amerikane për Evropë dhe Afrikë (USAREUR-AF), ku u nderua gjeneral Christopher T. Donahue.
Me këtë rast, gjeneral Jashari shprehu mirënjohje për gjeneralin Donahue, duke vlerësuar lidershipin e tij dhe mbështetjen e vazhdueshme që ka dhënë për zhvillimin e kapaciteteve të FSK-së dhe thellimin e bashkëpunimit ndërmjet dy forcave.
Nga ana e tij, gjeneral Donahue falënderoi komandantin e FSK-së për pjesëmarrjen në ceremoni dhe vlerësoi bashkëpunimin e ngushtë ndërmjet FSK-së dhe USAREUR-AF, veçanërisht në fushën e trajnimeve dhe ushtrimeve të përbashkëta, të cilat kanë forcuar ndërveprueshmërinë dhe partneritetin mes dy ushtrive.
Gjatë qëndrimit, gjeneral Jashari zhvilloi takime edhe me homologë nga vendet partnere të NATO-s, si dhe me zëvendëskomandantin dhe ushtruesin e detyrës së komandantit të USAREUR-AF, gjeneralmajor Christopher Norrie. Në takim, palët u dakorduan për vazhdimin e bashkëpunimit dhe zgjerimin e aktiviteteve të përbashkëta.
Në përfundim të ceremonisë, u rikonfirmua përkushtimi i ndërsjellë për forcimin e partneritetit strategjik ndërmjet FSK-së dhe USAREUR-AF, me synim avancimin e kapaciteteve mbrojtëse, forcimin e sigurisë dhe ruajtjen e stabilitetit e paqes në Kosovë dhe në rajon.
