Një 64 vjeçar është gjetur pa shenja jete në oborrin e shtëpisë së tij në fshatin Cërnicë të Komunës së Gjilanit.
Lajmin për tëvë1.info e ka konfirmuar zëdhënësi i Policisë për rajonin e Gjilanit, Ismet Hashani.
Sipas Hashanit, vdekja e viktimës është konstatuar nga mjeku kujdestar në vendngjarje, ndërsa nga hetimet e para dyshohet për vetëvrasje.
“Me datën 04.08.2025 rreth orës 08:00, kemi pranuar informacion nga familjarët se në oborrin e shtëpisë së tij në fshatin Cërnicë të komunës së Gjilanit, është gjetur pa shenja jete një person i gjinisë mashkullore, i lindur në vitin 1961 . Njësitet relevante policore, së bashku me Prokurorin e Shtetit dhe ekipin emergjent mjekësor, kanë dalë menjëherë në vendin e ngjarjes, ku nga mjeku kujdestar është konstatuar vdekja e viktimës ,nga hetimet e para dyshohet për vetëvrasje”, ka thënë Hashani.
Ai, po ashtu ka bërë të ditur se me urdhër të prokurorit kompetent, trupi i pajetë është dërguar në Institutin e Mjekësisë Ligjore për obduksion.
“Hetimet rreth këtij rasti i cilësuar si ‘Hetim i vdekjes’ janë duke vazhduar”, ka theksuar Hashani.
