E rastin e ka konfirmuar Policia e Kosovës.
“Rreth orës 13:00, kemi pranuar informatën për një person të lënduar të shtrirë në afërsi të një objekti në rrugën “Ferat Dragaj” në Prishtinë. Policia dhe ekipi mjekësor menjëherë kanë dalë në vendin e ngjarjes, ku nga ekipi mjekësor është konstatuar vdekja e personit (femër)”, thuhet në konfirmimin e Policisë.
Ndërkaq vdekjen si të dyshimtë po e konsideron Prokuroria Themelore.
“Ju njoftojmë se prokurorja kujdestare nga Departamenti i Krimeve të Rënda ndodhet në vendin e ngjarjes me njësitë e tjera relevante. Është gjetur një trup pa shenja jete (femër). Sipas informatave fillestare nga vendi i ngjarjes rasti ka të bëjë me vdekje në rrethana të dyshimta, mirëpo Prokuroria në koordinim me të gjitha institucionet relevante janë duke i ndërmarrë veprimet e nevojshme hetimore për t’i ndriçuar të gjitha rrethanat e këtij rasti. Pas ekzaminimeve nga vendi i ngjarjes, trupi i pajetë do të dërgohet në IML për obduksion”, tha zëdhënësja e Prokurorisë Themelore të Prishtinës, Laureta Ulaj.
Por nga urgjenca bëjnë të ditur se në vendngjarje ka pasur edhe gjakderdhje.
Andaj këtu erdhi edhe një ekip i pastrimit.
Përreth dy orë ata vazhduan pastrimin e gjakut në ndërtesën ku kishte qenë trupi i pajetë.
E dëshmitarët okularë të cilët banojnë këtu thonë se nuk e kanë njohur gruan.
“Po qet shumë gjak prej gojës, edhe kam këqyr ma poshtë krejt shkallët ishin mbushë me gjak, unë mendoj se ajo kishte shku t’u u zvarritë, ndoshta ka pasë me shku dikun. Pastaj nuk dija a me shku teposhtë a me u kthy në banesë edhe qashtu e kam kapërcy atë, momentin që ja kam nisë me kapërcy ajo veç ndërroi jetë, ju nal edhe lëvizjet edhe krejt. Pastaj kam ardh këtu poshtë e kam thirrë policinë, për dy tre minuta ka ardhë ambulanta kanë hy brena, pastaj kanë ardhë policia edhe ma nuk na kanë lanë me hy brena”, tha ai.
Nga Policia e Kosovës thonë se po ndërmerren të gjitha veprimet e duhura hetimore dhe ato forenzike – të ekzaminimit, që do të ndihmonin hetimin e ngjarjes si dhe sqarimin dhe ndriçimin e plotë të rastit.
Kronika e gazetares Albiona Hajdari.
