Një mjet i dyshuar shpërthyes, i identifikuar si granatë dore, është gjetur të enjten në mëngjes në një veturë të parkuar në oborrin e një shtëpie në Prizren.
Sipas raportit të Policisë së Kosovës, rasti ka ndodhur më 23 korrik 2026, rreth orës 08:30. Pas pranimit të informatës, njësitet policore kanë dalë në vendin e ngjarjes, ku kanë konstatuar se në një veturë ndodhej një mjet i dyshuar i pashpërthyer.
“Njësitet policore pas pranimit të informatës lidhur me rastin, kanë dalë në vendin e ngjarjes dhe në një veturë në oborrin e viktimës kosovar kanë vërejtur një mjet të dyshuar të pashpërthyer – granatë dore. Lidhur me rastin, njësitet policore kanë siguruar vendin e ngjarjes dhe kanë evakuuar banorët, ndërsa njësitet policore të deminimit, pasi kanë dalë në vendin e ngjarjes, kanë shpërthyer mjetin në mënyrë të sigurt dhe të kontrolluar”, thuhet në raportin e Policisë.
Pas ndërhyrjes së njësive të deminimit, mjeti i dyshuar është asgjësuar përmes një shpërthimi të kontrolluar.
Rasti është duke u trajtuar nga organet kompetente, ndërsa nuk janë raportuar persona të lënduar.
