Një granatë dore dhe nëntë gëzhoja të pushkës së gjuetisë janë gjetur të shtunën në rrugën “Arsim Muzaqi” në Vushtrri.
Rasti është raportuar në Polici pasi një dëshmitar ka marrë informacion nga disa fëmijë, të cilët kishin vërejtur një mjet të dyshimtë dhe dyshonin se bëhej fjalë për bombë dore.
Pas daljes në vendin e ngjarjes, zyrtarët policorë kanë siguruar zonën, ndërsa njësitet përkatëse kanë bërë sekuestrimin e granatës dhe gëzhojave.
“Dëshmitari ka raportuar se derisa ka qenë duke kaluar rrugën, disa fëmijë e kanë njoftuar se kanë parë një bombë dore. Dëshmitari ka njoftuar Policinë e cila ka dalë dhe e kanë siguruar vendin e ngjarjes. Njësitë përkatëse të PK-së kanë sekuestruar një granatë dore dhe 9 gëzhoja të pushkës së gjuetisë”, thuhet në njoftimin e Policisë së Kosovës.
Lidhur me rastin është njoftuar prokurori kompetent, ndërsa hetimet janë duke vazhduar.
Rasti është iniciuar si “Mbajtje në pronësi, kontroll ose posedim i paautorizuar i armëve”.
