Zëdhënësi i Policisë Nysret Xhurkaj ka thënë për Teve1.info se për vdekjen e 27-vjeçarit ka njoftuar punëtori i hotelit.
Sipas Xhurkajt, viktima në fjalë ka qenë shqiptar nga Kosova me shtetësi amerikane.
“Sot me datë 04.03.2022, rreth orës 14:00, Stacioni policor-Gjakovë është njoftuar për një person të varur në terasën e hotel “Luxus” –Gjakovë. Patrulla policore ka shkuar në atë lokacion dhe ka takuar punëtorin në hotelin “Luxus” dhe i njëjti ka informuar se këtë person e ka pranuar mbrëmë rreth mesnatës, kurse sot ka vërejtur këtë person të varur në terasën e hotelit. Në vendngjarje po ashtu ka dalë emergjenca dhe mjeku kujdestar, ku ka bërë konstatimin e vdekjes së personit të moshës 1995”, tha Xhurkaj.
Xhurkaj shtoi se në lidhje me rastin është informuar edhe prokurori kujdestar i cili ka dalë në vendin e ngjarjes, teksa theksoi se trupi i viktimës është dërguar në IML për autopsi. /Teve1.info/
