Hetuesit policorë nga Njësiti i Hetimeve në Stacionin Policor në Novobërdë kanë bërë të ditur se rasti i raportuar më 17 qershor 2026 si vjedhje e një automjeti në fshatin Kufcë e Epërme nuk përbën elemente të veprës penale “vjedhje e rëndë”.
Sipas njoftimit të Policisë së Kosovës, pas veprimeve intensive operative dhe hetimore në terren, të zhvilluara në koordinim me Prokurorinë e Shtetit, janë siguruar prova të mjaftueshme që tregojnë se rasti nuk ka karakter penal.
Nga verifikimet dhe intervistat e realizuara, është konstatuar se raportimi ka ardhur si pasojë e mungesës së informacionit të plotë nga ankuesja lidhur me shfrytëzimin e automjetit, një veturë e tipit Audi me targa vendore. Sipas policisë, automjeti ishte marrë në përdorim nga një familjar i saj në kohën kur ishte raportuar si i vjedhur.
“Gjatë hetimeve janë sqaruar të gjitha rrethanat relevante që kanë çuar deri te raportimi i rastit”, thuhet në njoftimin e Policisë së Kosovës.
Autoritetet kanë konfirmuar se rasti është mbyllur pa elemente të veprës penale.
Postimi i plotë:
