Në lagjen “Mati 1” në Prishtinë për një kohë të gjatë dyshohej për mbetje mortore të dy trupave të shqiptarëve të zhdukur me dhunë gjatë luftës së fundit në Kosovë.
Andaj arkeologët nga Instituti i Mjekësisë Ligjore dhe nga misioni i EULEX-it që nga mëngjesi i së hënës filluan punët për gërmime.
E për ta vëzhguar nga afër këtë proces erdhi edhe Ambasadori i Britanisë së Madhe në Kosovë, Nicholas Abbott.
Pas disa orë gërmime puna e arkeologëve në terren doli të jetë e suksesshme pasi që u zbuluan mbetjet mortore të një personi.
Arkeologu nga Misioni i Eulex-it, Javier Naranjo, ka treguar se disa hulumtime që ishin bërë në të kaluarën në këtë zonë, ia kanë lehtësuar punën e kërkimit.
“Disa hulumtime të ekipeve zvicerane gjatë vitit 1999 na kanë ndihmuar shumë për kërkimet që i bëmë sot. Fillimisht i kemi bërë disa analiza dhe e kemi studiuar terrenin. Fatmirësisht pas disa orë kërkimesh puna rezultoi me sukses. Ne arritëm të gjenim mbetje mortore të një personi. Është mese e qartë se eshtrat e personit që gjetëm sot i takojnë periudhës së luftës së fundit në Kosovës. Nesër do të vazhdojmë kërkimet për personin tjetër” ,tha ai.
Ndërsa, Kushtrim Gara nga Komisioni Qeveritar për Personat e Zhdukur, ka kërkuar nga Serbia të zbatoj marrëveshjen e arritur me Kosovën dhe ti hap arkivat shtetërore.
Kujtojmë që në takimin e fundit në Bruksel, kryeministri i Kosovës, Albin Kurti dhe presidenti i Serbisë, Aleksandar Vuçiq arritën dakordim për deklaratën e Personave të Zhdukur.
