Komisioni Qeveritar për Persona të Zhdukur (KQPZh) ka njoftuar se janë duke vazhduar aktivitetet në terren në kuadër të rifillimit të gërmimeve vlerësuese në lokacionin “Përzhina” në Rahovec.
Sipas njoftimit të këtij komisioni, gjatë punimeve të zhvilluara në këtë zonë janë hasur mbetje mortore, të cilat janë zhvarrosur dhe dërguar për ekzaminim në Institutin e Mjekësisë Ligjore.
“Me rastin e rifillimit të punimeve, të enjten më 4 mars 2026, janë hasur pjesë kockore, të cilat janë zhvarrosur dhe dërguar në Institutin e Mjekësisë Ligjore”, thuhet në njoftimin e KQPZh.
Po ashtu, gjatë aktiviteteve të zhvilluara në terren është evidentuar se mbetjet mortore të gjetura mund t’i përkasin së paku një individi.
“Numri i saktë i individëve dhe identiteti i tyre do të konfirmohen pas përfundimit të ekzaminimeve mjeko-ligjore dhe analizave përkatëse, përfshirë edhe identifikimin përmes ADN-së”, bëri të ditur komisioni.
KQPZh njoftoi se gërmimet në këtë lokacion do të vazhdojnë edhe në ditët në vijim, deri në vlerësimin e plotë të zonës së shënjuar.
Sipas këtij komisioni, procesi po zhvillohet në koordinim ndërinstitucional mes Komisionit Qeveritar për Persona të Zhdukur, Drejtorisë së Policisë për Hetimin e Krimeve të Luftës – Sektorit për Persona të Zhdukur, Institutit të Mjekësisë Ligjore, si dhe organeve të drejtësisë.
“Këto aktivitete po zhvillohen me përkushtim të plotë institucional, me qëllim të ndriçimit të fatit dhe vendndodhjes së personave të zhdukur me forcë gjatë luftës në Kosovë”, thuhet në njoftim.
