Shiriti i Policisë u vendos në hyrje të varrezave në Dragodan. Këtu u panë njësi të shumta policie e të Institutit të Mjekësisë Ligjore, madje në vendngjarje erdhën edhe vetura të misionit të EULEX-it në Kosovë.
Kjo pasi që në këtë lokacion, u realizuan disa gërmime nën dyshimin për një trup që besohet se i përket Luftës së fundit në Kosovë.
Këtë e ka konfirmuar edhe Ditor Haliti, drejtor i Institutit të Mjekësisë Ligjore dhe se gërmimet ishin të planifikuara, me urdhëresë të Gjykatës.
“Në vendin e ngjarjes janë Policia e Kosovës, EULEX-i, Prokuroria, IML-ja dhe Komisioni Qeveritar për të Pagjeturit. Gërmimi ka qenë i planifikuar, pas dyshimeve tona për mbetje mortore nga lufta e fundit, në afërsi të varrezave në Dragodan”, ka konfirmuar drejtori i IML-se, Ditor Haliti.
E pas disa orësh punë, njësitë relevante u larguan nga varrezat, por duke ndaluar hyrjen në këtë zonë.
Drejtori i këtij institucioni ka bërë të ditur se mbetjet do të dërgohen në Institutin e Mjekësisë Ligjore për ekzaminime të mëtutjeshme mjekoligjore.
Ndërkaq, gërmimet e planifikuara do të vazhdojnë për gjetjen e mundshme të mbetjeve tjera.
