Sektori për Hetimin e Personave të Zhdukur gjatë Luftës, në bashkëpunim me Institutin e Mjekësisë Ligjore (IML), ka realizuar një urdhëresë për gërmim në një lokacion në komunën e Rahovecit, ku janë gjetur mbetje eshtrore që dyshohet se i përkasin të paktën një personi të zhdukur gjatë luftës në Kosovë.
Sipas raportit 24-orësh të Policisë së Kosovës, mbetjet janë zbuluar gjatë procesit të eksumimit dhe janë larguar nga vendi i ngjarjes për t’u dërguar në Institutin e Mjekësisë Ligjore, ku do t’i nënshtrohen ekzaminimeve mjeko-ligjore dhe analizave të mëtejshme identifikuese.
Nga Policia e Kosovës bëhet e ditur se veprimet janë zhvilluar në kuadër të përpjekjeve të vazhdueshme për zbardhjen e fatit të personave të zhdukur gjatë luftës, ndërsa hetimet lidhur me rastin do të vazhdojnë.
“Njësitë policore nga Sektori për Hetimin e Personave të Zhdukur Gjatë Luftës në koordinim me Institutin e Mjekësisë Ligjore kanë realizuar një urdhëresë ku gjatë gërmimit (eksumimit) kanë gjetur mbetje eshtërore që dyshohet se i përkasin të paktën një personi të zhdukur në kohën e luftës në Kosovë. Mbetjet janë tërhequr nga vendi i ngjarjes dhe janë dërguar në IML për ekzaminime mjeko-ligjore”, thuhet në njoftim.
