Mbetje mortore edhe të një personi tjetë si janë gjetur në rajonin e Rahovecit, për të cilat dyshohet se u përkasin viktimave të luftës së fundit në Kosovë.
Lajmin e ka konfirmuar për Tëvë1 Kushtrim Gara nga Komisioni Qeveritar për Persona të Zhdukur, i cili ka bërë të ditur se gjatë gërmimeve të sotme janë zbuluar edhe eshtra të një personi të dytë.
“Po, janë gjetur edhe eshtra të personit të dytë sot gjatë gërmimeve,” ka deklaruar Gara.
Gërmimet po zhvillohen nga Instituti i Mjekësisë Ligjore, Sektori për Hetimin e Personave të Zhdukur gjatë Luftës në kuadër të Drejtorisë së Policisë për Hetimin e Krimeve të Luftës, si dhe Komisioni Qeveritar për Persona të Zhdukur.
Operacionet po vazhdojnë në lokacionin e njohur si Përzhina, pranë varrezave të qytetit të Rahovecit, ku ditëve të fundit janë zbuluar disa mbetje mortore që dyshohet se u përkasin viktimave të luftës dhe personave ende në listën e të zhdukurve.
Në vendngjarje kanë qenë të pranishëm edhe pjesëtarë të EULEX-it dhe KFOR-it, të cilët po asistojnë autoritetet vendore në procesin e gërmimeve dhe hetimeve.
