Disa vite më parë, Ghetto Geasy zbuloi në një intervistë se kishte kaluar një sfidë shëndetësore, por pa dhënë asnjë detaj më shumë.
Më pas, këtë episod do ta rrëfente më gjatë Marina Vjollca, duke e ndarë si një nga momentet më të vështira në jetën private.
Ndërkaq, për herë të parë, Geasy ka zbuluar konkretisht për çfarë bëhet fjalë, gjatë një interviste në “Canape”.
“Kom pasë kancer,” u shpreh Getoari , duke shtuar se ka qenë një periudhë e errët dhe jashtëzakonisht sfiduese, si në aspektin personal ashtu edhe në atë profesional.
“Ajo ka qenë pjesa që ka bërë një kthesë shumë të madhe në jetën tem”, shtoi reperi.
Reperi zbuloi se sëmundja kishte ndodhur katër vite më parë, por kishte zgjedhur ta mbante private, duke mos dashur që publiku ta shihte ndryshe apo ta ngarkonte me dhimbjen e tij.
Nuk kam dashur të kërkoj mëshirë. E kam mbajtur për vete, për familjen. Nuk doja që njerëzit të më mëshironin, por të më mbanin mend për atë që jam si artist dhe si njeri,” tha ai.
Ndërsa foli për periudhën e trajtimit dhe përballjes me të panjohurën, Geti e përshkroi si një betejë jo vetëm fizike, por edhe emocionale. Ka pasur momente kur është ndjerë i vetëm, por forca e tij, mbështetja nga familjarët dhe miqtë e afërt, e kanë ndihmuar të mos dorëzohet.
