Me ftesë të Ministrit të Punëve të Jashtme të Republikës së Turqisë, Hakan Fidan, ministrja në detyrë e Punëve të Jashtme të Kosovës, Donika Gërvalla, ka zhvilluar një takim bilateral gjatë sesionit të dytë të Platformës së Paqes për Ballkanin në Stamboll.
Gjatë takimit, Gërvalla ka theksuar se përmes pjesëmarrjes në këtë platformë, Kosova riafirmon orientimin e saj strategjik drejt integrimit euroatlantik, përfshirë anëtarësimin në Bashkimin Evropian dhe NATO, si dhe angazhimin e vendit për paqe të qëndrueshme, fqinjësi të mirë dhe stabilitet rajonal.
Ministrja në detyrë po ashtu ka nënvizuar rëndësinë e thellimit të bashkëpunimit në fushën e sigurisë dhe përpjekjeve të përbashkëta për një rajon më të sigurt.
Ajo ka vlerësuar rolin e Turqisë si shtet mik dhe aleat i ngushtë i Kosovës, duke e cilësuar atë partner të rëndësishëm në promovimin e paqes, stabilitetit dhe bashkëpunimit rajonal.
“Falënderova Ministrin Fidan për ftesën dhe mikpritjen, duke ritheksuar marrëdhëniet e shkëlqyera dhe partneritetin e qëndrueshëm ndërmjet Republikës së Kosovës dhe Republikës së Turqisë, si dhe rolin e saj në avancimin e dialogut, paqes dhe stabilitetit në rajon dhe më gjerë”, ka shkruar Gërvalla në Facebook./teve1.info/.
Me ftesë të Kryediplomatit të Turqisë, Gërvalla merr pjesë në Platformën e Paqes për Ballkanin
