Kryetarja e Partisë Guxo, Donika Gërvalla, u ka bërë thirrje subjekteve politike që të angazhohen në dialog për të gjetur një zgjidhje për çështjen e zgjedhjes së presidentit dhe për të shmangur një tjetër ngërç institucional.
Në një reagim publik, Gërvalla ka theksuar se Kosova ka nevojë për përgjegjësi politike, dialog dhe marrëveshje, duke thënë se interesat partiake duhet t’i lënë vend interesit të Republikës.
Ajo ka bërë thirrje që partitë politike të marrin pjesë në takimet konsultative, duke vlerësuar se shmangia e dialogut është ikje nga përgjegjësia politike dhe shtetërore.
“Në këtë moment, interesat partiake duhet t’i lënë vend interesit të Republikës. Marrëveshja nuk është dobësi politike. Është përgjegjësi shtetërore”, ka shkruar Gërvalla.
Sipas saj, në takimin e thirrur nga ushtruesja e detyrës së Presidentes, Albulena Haxhiu, është diskutuar për nevojën e gjetjes së një rrugëdaljeje nga situata aktuale politike.
Gërvalla ka kërkuar që të gjitha subjektet politike të kontribuojnë në zgjidhjen e çështjes së Presidentit, përmes propozimit të emrave konkretë për një kandidat konsensual.
Ajo ka theksuar se nuk është e nevojshme që partitë të pajtohen për çdo çështje, por sipas saj, duhet të ekzistojë guximi politik për të arritur dakordim për atë që është e domosdoshme për funksionimin e institucioneve.
“Ejani në takim! Të flasim! Aty kontribuohet për zgjidhjen që i duhet shtetit”, ka përfunduar Gërvalla.
