Në Ministrinë e Drejtësisë është mbajtur takimi i parë i Grupit Punues për hartimin e Strategjisë Kombëtare për Mbrojtjen nga Dhuna në Familje, Dhuna ndaj Grave dhe Dhuna me Bazë Gjinore 2027–2031.
Takimin e ka hapur zëvendëskryeministrja dhe ministrja në detyrë e Drejtësisë, Donika Gërvalla, në cilësinë e Koordinatores Kombëtare për Mbrojtje nga Dhuna në Familje, Dhuna ndaj Grave dhe Dhuna me Bazë Gjinore.
Gërvalla tha se strategjia e re duhet të adresojë sfidat konkrete dhe të përmbajë hapa të guximshëm për parandalimin dhe luftimin e dhunës.
“Për Strategjinë 2027–2031 duhet të jemi të guximshëm, duhet të adresojmë tema të cilat na duken sot që janë të vështira”, u shpreh Gërvalla.
Ajo theksoi se luftimi i dhunës nuk ndikon vetëm te gratë, por edhe te fëmijët dhe familjet, ndaj sipas saj nevojitet një qasje më e gjerë dhe gjithëpërfshirëse.
Ministrja në detyrë tha gjithashtu se rritja e numrit të rasteve të raportuara të dhunës në familje nuk nënkupton domosdoshmërisht rritje të rasteve, por mund të jetë rezultat i fushatave ndërgjegjësuese dhe angazhimit më të madh të mekanizmave shtetërorë.
Ajo vlerësoi edhe rolin e shoqërisë civile, organizatave dhe individëve që, sipas saj, ndër vite kanë kërkuar që institucionet ta trajtojnë dhunën me seriozitet.
Gjatë takimit janë diskutuar gjetjet e analizës së strategjisë aktuale, si dhe objektivat strategjike dhe specifike që pritet të përfshihen në strategjinë e re.
Grupi Punues do të vazhdojë punën në takimet e ardhshme, me synim hartimin e Strategjisë Kombëtare 2027–2031, e cila synon forcimin e politikave dhe mekanizmave institucionalë për parandalimin dhe trajtimin e dhunës, si dhe rritjen e bashkëpunimit ndërinstitucional.
