Ministrja e Drejtësisë, Donika Gërvalla, ka njoftuar se janë përmbyllur diskutimet treditore që, sipas saj, çojnë drejt finalizimit të njërit prej proceseve më të rëndësishme reformuese në sistemin e drejtësisë.
Ajo bëri të ditur se, së bashku me përfaqësues të sistemit gjyqësor dhe prokurorial, institucioneve relevante, organizatave të shoqërisë civile dhe partnerëve ndërkombëtarë, është avancuar pakoja e projektligjeve që burojnë nga Deklarata e Përbashkët e Zotimit.
Sipas Gërvallës, kjo nismë, e nisur në vitin 2023, ka rezultuar me hartimin e gjashtë projektligjeve që trajtojnë çështje kyçe si kontrolli i integritetit të gjyqtarëve dhe prokurorëve, vlerësimi i performancës së tyre, sistemi disiplinor, kontrolli i pasurisë, si dhe funksionimi i Akademisë së Drejtësisë dhe administratës së gjykatave e prokurorive.
Ministrja ka theksuar se finalizimi i kësaj faze të reformës pritet të ndikojë ndjeshëm në forcimin e sistemit të drejtësisë në Kosovë, duke vendosur në qendër qytetarin, si dhe duke rritur integritetin dhe profesionalizmin institucional.
Ajo ka shtuar se, përmes këtyre projektligjeve, për herë të parë adresohen çështje si shkarkimi i gjyqtarëve dhe prokurorëve për mungesë performance, kategorizimi i shkeljeve disiplinore dhe rregullimi ligjor i vlerësimit të performancës së tyre.
Këto gjashtë projektligje janë pjesë e agjendës së reformave në kuadër të Planit të Rritjes të Bashkimit Evropian dhe pritet të procedohen së shpejti për miratim në Qeveri dhe Kuvend.
“Si Ministre e Drejtësisë, jam plotësisht e përkushtuar për finalizimin dhe zbatimin e kësaj reforme, për të garantuar një sistem me standarde të reja profesionale, në shërbim të çdo qytetari”, ka shkruar Gërvalla në Facebook./teve1.info/
