Ministrja në detyrë e Punëve të Jashtme, Donika Gërvalla, ka deklaruar se vendi nuk do të ishte në gjendjen aktuale politike sikur Lëvizja Vetëvendosje të pranonte pazare politike në procesin e formimit të institucioneve.
Në emisionin “Këndi I Debatit” në Tëvë1, Gërvalla ka thënë se kërkesa e kryetarit të Nismës Socialdemokrate, Fatmir Limaj, për t’u bërë kryeparlamentar është refuzuar që në fillim pikërisht sepse Vetëvendosje, sipas saj, nuk pranon marrëveshje të tilla të interesit të ngushtë politik.
Ajo ka theksuar se VV-ja ka kërkuar bashkëpunim parimor dhe jo marrëveshje që, siç tha, kanë qenë të zakonshme në të kaluarën, duke kujtuar rastet kur “parti me dy deputetë kanë përcaktuar përbërjen e qeverisë”.
“Nëse do të ishim parti e pazareve, atëherë kërkesën e Fatmir Limajt për t’u bërë kryeparlamentar do ta kishim pranuar që në fillim dhe institucionet do të ishin konstituuar pa asnjë debat. Mirëpo, për shkak se ne nuk bëjmë pazare dhe kemi kërkuar vazhdimisht bashkëpunim parimor, jashtë praktikave të zakonshme, situata ka ardhur deri këtu.Jemi dëshmitarë se në të kaluarën ka pasur parti që me vetëm dy deputetë kanë ndikuar në përbërjen e qeverisë. Ne nuk veprojmë kështu, sepse secilin e vlerësojmë sipas peshës që ka. Po të pranonim pazare, nuk do të ndodhnim në këtë gjendje. Por pazaret paguhen shtrenjtë në fund, dhe jo individualisht; çmimin e tyre e ka paguar gjithmonë Kosova”, ka deklaruar Gërvalla./teve1.info/
