Ministrja e Punëve të Jashtme në detyrë, Donika Gërvalla, do të marrë pjesë në takimin e Ministrave të Jashtëm në kuadër të Procesit të Bashkëpunimit të Evropës Juglindore (SEECP), që mbahet të hënën në Tiranë, nën organizimin e Shqipërisë si kryesuese e radhës e SEECP.
Në njoftimin e MPJD-së bëhet e ditur se Gërvalla në këtë samit do të jetë pjesëmarrëse me ftesë të Ministrit për Evropë dhe Punë të Jashtme të Shqipërisë, Igli Hasani.
“Takimi ministror do të fokusohet në temën: “Fuqizimi i Konkurrencës Rajonale dhe rritja gjithëpërfshirëse, si rruga drejt Integrimit në BE për vendet pjesëmarrëse të SEECP-së që aspirojnë anëtarësimin”, duke ofruar një rast të mirë për të thelluar diskutimet rreth zhvillimit ekonomik, rritjes së konkurrueshmërisë dhe përshpejtimin e proceseve të integrimit evropian”, thuhet në njoftim.
Sipas MPJD-së, prania e Gërvallës në këtë takim tregon përkushtimin e palëkundur të Kosovës ndaj bashkëpunimit rajonal dhe rrugës evropiane, si dhe mbështetjen për nisma që shtyejnë përpara paqen, stabilitetin, sigurinë dhe përparimin e përbashkët në Evropën Juglindore.
