Ministrja në detyrë e Drejtësisë, Donika Gërvalla, ka deklaruar se ndryshimet në Ligjin për Pronën Publike kanë për synim krijimin e një kornize të qartë ligjore që garanton siguri juridike dhe administrim më efikas të pronës publike.
Në hapjen e punëtorisë për shqyrtimin dhe finalizimin e Projektligjit për Ndryshimin dhe Plotësimin e Ligjit për Pronën Publike, Gërvalla tha se ndryshimi i ligjit është i domosdoshëm për të adresuar sfidat e evidentuara gjatë zbatimit të tij dhe se suksesi i reformës varet edhe nga harmonizimi me legjislacionin tjetër që rregullon këtë fushë.
Ajo theksoi se prona publike është pasuri e Republikës së Kosovës dhe administrimi i saj kërkon rregulla të qarta, përgjegjësi institucionale dhe një vizion afatgjatë. Sipas saj, ndryshimet e propozuara synojnë të mbrojnë interesin publik, duke krijuar njëkohësisht kushte më të favorshme për zhvillimin ekonomik dhe investimet.
Gërvalla vlerësoi se një kuadër ligjor i qartë, i harmonizuar dhe i parashikueshëm është parakusht për forcimin e sundimit të ligjit, rritjen e besimit në institucione dhe krijimin e një mjedisi të qëndrueshëm për të gjithë akterët që ndërveprojnë me pronën publike.
Ajo shtoi se synimi i Ministrisë së Drejtësisë është që, përmes një procesi gjithëpërfshirës dhe diskutimeve me institucionet dhe akterët relevantë, të finalizohet sa më shpejt një draft i projektligjit, i cili më pas do të procedohet për miratim në Qeveri./rtk
