Ministrja e Punëve të Jashtme të Kosovës, Donika Gërvalla, ka thënë se krimet, vrasjet e shkatërrimet e Serbisë në Kosovë mbesin fakte.
Ajo kështu ka deklaruar pas dështimit të iniciativës së Rusisë për një seancë për të ngritur paralele mes ndërhyrjes së NATO-s dhe luftës së Rusisë në Ukrainë.
“Qindra masakra të tmerrshme që Serbia bëri në Kosovë, vrasja mizore e 1432 fëmijëve, përdhunimi i mijërave grave, vajzave, burrave dhe fëmijëve, zhdukja e viktimave të luftës dhe shkatërrimi i pasurisë së Kosovës ishin dhe mbeten fakt. Por po aq mbetet fakt që Kosova sot është shtet i pavarur dhe sovran i qytetarëve të saj. Në 25 vitet e pasluftës, Kosova ka avancuar në zhvillim të demokracisë, sundim të ligjit, respektim të të drejtave të njeriut, zhvillim ekonomik dhe integrim në mekanizmat ndërkombëtar, ndërkohe që Serbia dhe Rusia kanë mbetur në të kaluarën e tyre të errët, që fatkeqësisht po i përcjell edhe sot dhe që po i çon drejt izolimit”, ka shkruar Gërvalla.
Ajo ka përshëndetur unitetit e vendeve aleate të Kosovës të cilat nuk e përkrahën një seancë të tillë.
Përshëndetëm megjithatë unitetin e partnerëve, miqve dhe aleatëve tanë për moslejimin e mbajtjes së kësaj seance propagandistike. Rusia mbeti e vetme në përpjekjet e saj të rrezikshme për ta shfrytëzuar Këshillin e Sigurimit për të shtrembëruar të vërtetën.
Me vetëm 3 vota pro (mes tyre Federata Ruse) dhe 13 abstenime, iniciativa e Rusisë nuk kaloi.
