Përmes njoftimit, MPJD ka bërë të ditur se gjatë takimit Gërvalla ka potencuar faktin se Kosova i ka përmbushur të gjitha kriteret për liberalizim të vizave dhe kërkoi përkrahjen e Polonisë në këtë drejtim.
“Gjatë takimit ministrja Gërvalla, njoftoi zëvendësministrin e Jashtëm polak, lidhur me zhvillimin e gjithmbarshëm të Kosovës, orientimin strategjik të Kosovës në proceset integruese euro-atlantike dhe shprehu angazhimin e Qeverisë së Republikës së Kosovës për të thelluar bashkëpunimin me Poloninë në të gjitha fushat me interes të përbashkët. Në takim ministrja Gërvalla, potencoi faktin që Kosova i ka përmbushur të gjitha kriteret për liberalizimin e vizave dhe kërkoi përkrahjen e Polonisë për të mundësuar lëvizjen e lirë të qytetarëve të Kosovës dhe në procesin e aderimit në organizata ndërkombëtare”, thuhet ndër tjerash në njoftim.
Po ashtu, gjatë takimit mes tyre janë nënshkruar marrëveshjet e bashkëpunimit mes Akademive Diplomatike të të dy ministrive përkatëse.
“Gjithashtu, një vend të posaçëm në kuadër të bisedës në takim, kishte agresioni i Rusisë në Ukrainë. Me këtë rast ministrja Gërvalla shprehu solidaritetin jo vetëm me Ukrainën, por edhe Poloninë, e cila po bart barrën kryesore të ndihmës së refugjatëve ukrainas”, njofton tutje Ministria./teve1.info/
