Ministrja e Punëve të Jashtme dhe Diasporës, Donika Gërvalla, ka kërkuar sërish nga bashkësia ndërkombëtare që të dënojë Serbinë për aktin e agresionit ndaj Kosovës, më 24 shtator të vitit 2023.
Kryediplomatja kosovare pas takimit me homologun e saj nga Shqipëria, Igli Hasani, tha se Kosova dhe Shqipëria duhet të kenë unifikim, koordinim dhe bashkëveprim të politikës se jashtme.
“E njoftova Iglin për situatën në veri, ndryshimet thelbësore që kanë ndodhur atje, aktin e agresionit të hapur serb, duke theksuar se bashkësia ndërkombëtare pa vonesë të dalë me qëndrim të qartë të asaj që ka ndodhur në Banjskë dhe të sanksionojë agresorin. Mungesa e ndëshkimit bart në vete rrezikun e përsëritjes”, është shprehur Gërvalla.
Në anën tjetër, edhe shefi i diplomacisë shqiptare, Igli Hasani, theksoi se autorët e sulmit kriminal dhe terrorist në Banjskë duhet të dalin para drejtësisë.
Ai nënvizoi se Shqipëria është një aleat të përjetshëm i Kosovës.
