Ministrja në detyrë e Punëve të Jashtme, Donika Gërvalla, ka deklaruar se bashkëpunimi dhe siguria rajonale përbëjnë shtyllën themelore të politikës së jashtme të Republikës së Kosovës dhe bazamentin e çdo bashkëpunimi të qëndrueshëm për stabilitetin dhe prosperitetin e Ballkanit Perëndimor.
Ajo ka theksuar se në një realitet ndërkombëtar të shënuar nga pasiguria, kriza të ndërthurura dhe sfida gjeopolitike, bashkëpunimi rajonal i qëndrueshëm është shndërruar në një domosdoshmëri strategjike.
Sipas Gërvallës, bashkëpunimi me Turqinë, veçanërisht në fushën e mbrojtjes, është strategjik, transparent dhe i orientuar drejt paqes.
Ajo ka bërë të ditur se ky bashkëpunim synon forcimin e kapaciteteve institucionale të Kosovës dhe rritjen e kontributit në misionet ndërkombëtare paqeruajtëse.
Ministrja ka vënë në pah edhe rëndësinë e Platformës së Paqes për Ballkanin, duke theksuar se kjo platformë dëshmon se sfidat e sigurisë duhet të adresohen përmes dialogut dhe diplomacisë, e jo përmes konfrontimit.
“Ky është mesazhi që Kosova e përcjell në çdo forum rajonal dhe ndërkombëtar. Vetëm si të barabartë, mund të prosperojmë në paqe dhe siguri”, ka deklaruar Gërvalla.
Në kuadër të kësaj platforme, ajo ka riafirmuar angazhimin e Kosovës për bashkëpunim gjithëpërfshirës, forcimin e stabilitetit rajonal dhe avancimin e dialogut si instrument strategjik për paqen, sigurinë dhe zhvillimin e qëndrueshëm të rajonit.
