Zëvendëskryeministrja dhe ministrja e Drejtësisë në detyrë, Donika Gërvalla, ka pritur në takim kortezie shefin e ri të Misionit të EULEX-it në Kosovë, Antero Lopes.
Në takim është diskutuar për forcimin e sundimit të ligjit dhe thellimin e reformave në sistemin e drejtësisë.
Gërvalla ka theksuar se reformat në drejtësi janë të domosdoshme për konsolidimin e shtetit të së drejtës dhe se kërkojnë institucione me integritet, vendosmëri politike dhe zbatim të barabartë të ligjit.
“Reformat në drejtësi nuk janë zgjedhje politike e një momenti, por domosdoshmëri për konsolidimin e shtetit të së drejtës. Reformat në drejtësi kërkojnë vendosmëri politike, institucione me integritet dhe zbatim të barabartë të ligjit. Bashkëpunimi me EULEX-in dhe partnerët ndërkombëtarë mbetet i rëndësishëm për t’i çuar këto procese përpara dhe për të forcuar besimin në institucionet e drejtësisë”, ka thënë Gërvalla.
Ndër proceset kryesore reformuese, ministrja në detyrë ka përmendur funksionalizimin e Byrosë Shtetërore për Verifikimin dhe Konfiskimin e Pasurisë së Pajustifikueshme, procesin e Vetingut dhe miratimin e pakos ligjore për reformën në drejtësi.
Sipas Gërvallës, këto masa synojnë forcimin e integritetit, pavarësisë dhe besueshmërisë së sistemit të drejtësisë, si dhe luftimin e krimit, korrupsionit, ndikimeve të paligjshme dhe konflikteve të interesit.
Në takim është diskutuar edhe bashkëpunimi ndërmjet institucioneve të Kosovës dhe EULEX-it në monitorimin e sistemit të drejtësisë, veçanërisht në trajtimin e rasteve të dhunës në familje, dhunës ndaj grave dhe dhunës me bazë gjinore.
“Në këtë drejtim, bashkëpunimi me EULEX-in në monitorimin e sistemit të drejtësisë, veçanërisht në trajtimin institucional të rasteve të dhunës në familje, dhunës ndaj grave dhe dhunës me bazë gjinore, mbetet jashtëzakonisht i rëndësishëm për forcimin e përgjegjshmërisë institucionale dhe garantimin e një reagimi të shpejtë, të koordinuar dhe efektiv, me mbrojtjen e viktimave si prioritet”, ka theksuar ajo./teve1.info/
