Gërvalla në një konferencë të përbashkët për media, ka thënë se vizita e ministrit austriak ka nënvizuar edhe njëherë miqësinë e ngushtë me këtë shtet, raporton Teve1.info
Ajo ka përmendur edhe angazhimin e Schallenbergut për Kosovën gjatë bisedimeve në BE, KE dhe në vendet tjera rreth Kosovës.
“Austria bën pjesë në rrethin më të ngushtë të Kosovës. Numri i madh i qytetarëve që jeton në Austri ka një vlerë të posaçme për secilin nga dy shtetet tona. Vizita e tij ka nënvizuar edhe njëherë këtë miqësi të ngushtë. Është mbi të gjitha angazhimi i vazhdueshëm për Kosovën i Austrisë dhe këtu duhet veçuar kontributin e mikut tonë Aleksandër edhe jashtë këtyre vizitave, gjatë bisedimeve në BE, në KE dhe në vendet e tjera rreth Kosovës dhe rajonit tonë”, tha Gërvalla.
Gërvalla thekson se Austria ka rëndësi të madhe në procesin e integrimit të rajonit në BE.
“Në mesin e shteteve anëtare të BE-së, Austria meriton të veçohet si një akter shumë i rëndësishëm në procesin e integrimit të rajonit tonë në Bashkimin Evropian. Bashkëpunimi ynë është i ngushtë. E falënderova për mbështetjen aktive në përpjekjet tona për t’u anëtarësuar në KE”, tha ajo.
Kryediplomatja kosovare ka deklaruar se me Austrinë janë së bashku në procesin e Berlinit.
“Së bashku jemi në procesin e Berlinit i theksuar në mënyrë të veçantë edhe gjatë vizitës së kaluar të kancelarit gjerman në Kosovë i cili është kthyer në një proces të domosdoshëm për afrimin me BE-në dhe në të cilin Austria luan një rol të veçant”, ka thënë Gërvalla.
Po ashtu, ajo tregon edhe për bisedën që ka zhvilluar me tej me Schallenbergun.
“Me homologun folëm edhe për dialogun që Kosova po zhvillon me Serbinë rreth njohjes së ndërsjellë. Nënvizova gatishmërinë e Kosovës i cili do të mund të përfundonte shumë shpejt nëse Serbia do të hiqte dorë nga pozicioni i saj për bllokimin e procesit. Biseduam edhe rreth thellimit të marrëdhënieve bilaterale mes dy vendeve tona, në fusha të ndryshme si arsimi, ekonomia, shkenca dhe fusha të shumta të tjera”, përfundoi Gërvalla. /teve1.info/
