NK Lokomotiva Zagreb po vazhdon me përforcimin e skuadrës për pjesën e dytë të sezonit.
Emri më i ri i klubit elitar të Kroacisë, është mesfushori Gentrit Salihu, i cili është prezantuar të hënën.
Ai te Lokomotiva transferohet nga Prishtina, ekip për të cilin luajti në stinorin vjeshtor.
Gjatë stinorit vjeshtor, Salihu ka regjistruar 11 paraqitje dhe një gol me fanellën e Prishtinës, ndërsa ka qenë aktiv edhe në ndeshjet kualifikuese për UEFA Europa League dhe UEFA Conference League.
“Jam shumë i lumtur që jam bërë pjesë e një klubi që njihet për punën e shkëlqyer me lojtarët e rinj. Lokomotiva është ambienti ideal për zhvillimin tim të mëtejshëm dhe do të jap maksimumin për të justifikuar besimin e stafit teknik dhe për ta ndihmuar ekipin në realizimin e objektivave,” u shpreh Salihu gjatë nënshkrimit të kontratës.
