Situatë e tensionuar ka vazhduar të jetë edhe sot në fshatin Banjskë të Zveçanit. Gazetari i Tëvë 1, Arton Rama i cili ka qëndruar gjatë ditës në atë pjesë. bën të ditur se perimetri i sigurisë i krijuar nga Policia e Kosovës, ka qenë edhe sot njëjtë sikur dje.
Rama thotë se ka pasur lëvizje të mëdha të PK-së, e KFOR-it amerikan, teksa theksoi se ka pasur raste kur rruga ka qenë e mbyllur dhe për banorët e fshatit.
“Situata ka qenë e tensionuar, kjo edhe për shkak që ne si ekip i Tëvë 1 kemi arritur para orës 07:00, dhe policia ka qenë e stacionuar qysh prej orëve të para të mëngjesit të djeshëm kur ka ndodh edhe vrasja e policit të Kosovës. Kështu që, kur u afruam aty, ata nuk na lejuan, sikurse edhe dje. Pra ka qenë një perimetër i sigurisë i krijuar sikurse që ka qenë dje edhe në momentet e luftimeve mes Policisë së Kosovës dhe grupeve…rruga ka qenë e mbyllur jo vetëm për media, mirëpo ka pasur raste kur ndoshta banorët e këtij fshati kanë tentuar që të hyjnë me vetura, mirëpo janë kthyer që të gjithë. Pra perimetri i sigurisë i krijuar prej PK-së në fshatin Banjskë, shumë kilometra larg Manastirit, ka qenë i njëjti siç ka qenë edhe dje”, tha ai në “Ditari” në Tëvë 1.
Ai potencoi se gjatë qëndrimit sot në udhëkryqin në Banjskë, nuk është dëgjuar asnjë e shtënë, dhe se përveç PK-së, KFOR-it dhe njësive të EULEX-it, ndonëse më rrallë, nuk ka pasur diçka të jashtëzakonshme.
