Dikur, sa ishte në opozitë Lëvizja Vetëvendosje në krye me Albin Kurtin ishin të zëshëm në mbështetje të përpjekjeve për liri të popullit palestinez.
Por tani, kur në Gaza po kryhen krime kundër njerëzimit – sipas organizatave më të besueshme ndërkombëtare – kryeministri në detyrë, Albin Kurti, ka zgjedhur të qëndrojë i heshtur.
Analisti politik, Artan Muhaxhiri, vlerëson se kryeministri në detyrë, Albin Kurti si dhe presidentja e vendit, Vjosa Osmani do të duhej të ishin shumë më të zëshëm dhe të shprehnin solidaritet me viktimat në Gaza.
“Situata në Gaza i ka kaluar të gjitha kufijtë e njerëzores – numri i viktimave ka tejkaluar 60.000. Së fundmi, janë raportuar edhe raste të fëmijëve që po vdesin nga uria. Kjo është, me të vërtetë, një situatë e pakuptueshme për kohën në të cilën jetojmë. Të gjithë duhet të ngremë zërin për ta kundërshtuar këtë gjendje. Në aspektin njerëzor, kryeministri në detyrë, Albin Kurti, dhe presidentja Vjosa Osmani, do të duhej të ishin më të zëshëm dhe të shprehnin solidaritet me viktimat në Gaza”, ka thënë Muhaxhiri.
Në anën tjetër, politologu Shkodran Ramadani thotë se Kosova ndodhet në një pozitë delikate për shkak të marrëdhënieve të ngushta me Shtetet e Bashkuara të Amerikës.
Megjithatë, ai vlerëson se ekzistojnë forma të ndryshme përmes të cilave Kosova mund të reagojë ndaj vrasjeve të civilëve në Gaza.
“Nuk do të thosha se Kosova duhet të dalë hapur kundër Izraelit dhe pro Palestinës, por ka mundur të ndjekë një qasje më njerëzore – gjithnjë duke respektuar kufijtë dhe raportet që i dikton marrëdhënia me Shtetet e Bashkuara të Amerikës. Kosova ka pasur mundësi të bëjë thirrje më të shpeshta për armëpushim dhe të kërkojë ndalimin e kësaj fushate shfarosëse ndaj popullit palestinez”, është shprehur Ramadani.
Në lidhje me konfliktin në mes të Izraelit dhe Palestinës ka reaguar e para e shtetit Vjosa Osmani e cila ka kërkuar të ndalet katastrofa humanitare në Gaza.
Që nga tetori i vitit 2023, Izraeli ka vrarë në Rripin e Gazës të paktën mbi 60.000 palestinezë, shumica prej tyre gra dhe fëmijë.
Fushata ushtarake ka shkatërruar enklavën, ka shembur sistemin shëndetësor dhe ka çuar në mungesa të mëdha ushqimore.
