Anëtarja e Kryesisë së LDK-së, Besa Gaxherri, ka deklaruar se vendimi i presidentes së Kosovës për shpërbërjen e Kuvendit dhe dërgimin e vendit në zgjedhje është kushtetues.
Në emisionin “Ditari” në Tëvë1, Gaxherri tha se LDK e ka pritur mirë këtë vendim, edhe pse sipas saj kishte pasur dilema nëse një veprim i tillë do të ndodhte.
“Vendimi i presidentes Vjosa Osmani ka qenë kushtetues dhe ne e kemi pritur mirë, edhe pse unë personalisht kam pasur hamendje nëse mund të ndodhte një gjë e tillë. Gjatë këtij mandati kemi parë herë përplasje e herë mbështetje mes presidentes dhe kryeministrit Kurti, prandaj nuk ishte e qartë nëse presidentja do të vepronte sipas Kushtetutës apo nëse kishte diçka tjetër pas këtyre zhvillimeve”, tha Gaxherri.
Ajo shtoi se çështja ende nuk është plotësisht e qartë, pasi sipas saj vendimi është apeluar në Gjykatën Kushtetuese dhe duhet pritur vendimi i kësaj gjykate.
“Edhe pse nuk është ende gjithçka e qartë për të gjithë, duhet të presim përgjigjen e Gjykatës Kushtetuese, pasi vendimi është apeluar nga Vetëvendosje. Megjithatë, duket se vendi po shkon drejt zgjedhjeve dhe Kurti po e çon vendin për herë të pestë në zgjedhje brenda një viti”, u shpreh ajo.
E pyetur për dorëheqjen e deputetit Haxhi Avdyli nga partia Guxo, Gaxherri tha se kjo nuk mjafton dhe kritikoi ata që, sipas saj, kanë përdorur konceptin e frymës rugoviane për qëllime politike.
“Ne si LDK për vite me radhë kemi pasur presion duke u thënë se fryma rugoviane po kalon në Vetëvendosje përmes Vjosa Osmanit dhe Albin Kurtit. Sot po shohim se kjo nuk është e vërtetë. Nëse vërtet fryma rugoviane do të ishte aty, atëherë ku janë deputetët e zgjedhur nga ajo listë që sot janë në Kuvend dhe nuk reagojnë fare?”, deklaroi Gaxherri.
