I akuzuari për masakrën në Burgun e Dubravës, Gavrilo Milosavleviq, të hënën është shpallur i pafajshëm.
Gjykatësi, Vesel Ismaili, ka thënë se nuk është provuar se Milosavleviq ka kryer veprën penale për të cilën akuzohej.
Në aktakuzën e ngritur më 29 nëntor 2023, Gavrilo Milosavlevq akuzohej se në cilësi të zyrtarit në Burgun e Dubravës në bashkëkryerje me persona të tjerë kishte aplikuar masa represive të vrasjes, rrahjes, maltretimit, torturës, trajtimit në mënyrë mizore dhe çnjerëzor ndaj të burgosurve civilë shqiptarë.
Sipas aktakuzës, nga 22 deri më 24 maj, Milosavleviq bashkë me persona të tjerë kishin bërë rreshtimin e të burgosurve dhe më pas kishin filluar të gjuajnë në drejtim të tyre me mitralozë, mortajë e armë të tjera, ku kishin mbetur të vrarë të paktën 109 të burgosur.
Aktakuza ndaj të pandehurit, Gavrilo Milosavleviq ishte ngritur më 29.11.2023, ndërsa shqyrtimi fillestar ishte mbajtur më 07.12.2023.
Gjatë shqyrtimit fillestar i akuzuari Milosavleviq pas leximit të aktakuzës nga Prokuroria kishte deklaruar se e ka kuptuar veprën për të cilën po akuzohet, mirëpo kishte deklaruar se nuk ndjehet fajtor.
