Gennaro Gattuso e ka bërë menjëherë të qartë se do të ketë një qasje ndryshe në drejtimin e Kombëtares së Italisë, krahasuar me paraardhësin e tij, Luciano Spalletti. Në konferencën e tij të parë për shtyp si trajner i “Azzurrëve”, Gattuso ka theksuar se lojtarët e grumbulluar duhet të qëndrojnë në qendrën stërvitore të Covercianos edhe nëse kanë dëmtime të vogla.
I prezantuar zyrtarisht në një konferencë në Romë ditën e enjte, Gattuso pranoi se nuk do të ketë mundësi të bëjë “ndryshime të mëdha” në një kohë kaq të shkurtër, por vendimi i tij i parë shënon një kthesë të qartë nga mënyra e punës së Spallettit.
“Gjëja e parë që i kërkova presidentit Gravina dhe Buffonit ishte kjo: kushdo që vjen në Coverciano, qëndron aty, edhe nëse ka ndonjë problem të vogël fizik,” deklaroi Gattuso para mediave.
“Kemi gjithçka të nevojshme për t’i trajtuar lojtarët me probleme të lehta. Kjo është çështje besueshmërie. Nëse je grumbulluar, duhet të qëndrosh me grupin. Vetëm nëse nuk arrijmë t’i rikuperojmë, atëherë lojtari kthehet në klubin e tij. Ajo që ka më shumë rëndësi është që të kalojmë kohë së bashku, të ndërtojmë frymën e grupit. Kur luan 50-60 ndeshje në vit, është normale të kesh ndonjë shqetësim të vogël, por nuk mund të krijojmë precedenta të rrezikshëm.”
Ky qëndrim bie ndesh me qasjen e mëparshme të Luciano Spallettit, i cili zgjidhte të kthente në klube lojtarët që paraqiteshin me probleme fizike.
Një shembull i fundit ishte rasti i sulmuesit të Atalantas, Mateo Retegui, në muajin mars, kur Spalletti vendosi ta largojë nga grumbullimi për shkak të një problemi muskulor.
Pavarësisht ndryshimeve, Gattuso tha se kishte biseduar me paraardhësin e tij dhe se e vlerëson shumë punën e tij.
“Kam respekt të jashtëzakonshëm për Spallettin. Ai është një mendje e vërtetë futbolli dhe arrin të sjellë risi çdo vit,” përfundoi Gattuso.
