Shefi i grupit Parlamentar të Lidhjes Demokratike të Kosovës, Arben Gashi, ka deklaruar se po hyjmë në në muajt e fundit të legjislaturës së Kuvendit të Kosovës.
Sipas Gashit, kjo legjislaturë me këtë Qeveri dhe qeverisje do të mbetet si më e dobëta qeverisje në historinë e Kosovës, në shumë aspekte.
“Po hyjmë në muajt e fundit të legjislaturës së Kuvendit të Republikës së Kosovës. Pra me përfundimin e vitit kalendarik do të përfundojë edhe legjislatura e rradhës e Kuvendit të Kosovës. Kjo legjislaturë me këtë Qeveri dhe qeverisje mund të konsiderohet si qeverisja më e dobët në historinë e Kosovës, në aspektin e vendimmarrjes, në aspektin e ndërtimit të konsensusit politik dhe në aspektin e befasimit institucional të Kosovës. Është karakterizuar fillimisht me tendencë të kapjes së institucioneve, me shkelje të vazhdueshme të Kushtetutës nga ana e qeverisë dhe me tendenca të vazhdueshme për paaftësimin e vendimmarrjes së Kuvendit në aspektin e mbikëqyrjes parlamentare”, ka thënë Gashi në konferencë për media.
Më tej, Gashi, ka shtuar se si rezultat i kësaj qeverisje Kosova aktualisht është në situatë të sanksioneve ndërkombëtare dhe sipas tij me një qeveri e cila nuk e ka as kontrollin e qeverisjes.
“Pra, mund të themi se në aspektin e fushë veprimtarisëe si rezultat i dominimit të LVV-së dhe angazhimit të qeverisë së Albin Kurtit, të gjitha shtyllat e Kuvendit të Kosovës me këtë qeveri janë paaftësuar në funksionin e tyre. Pra, është për keqardhje që katër vitet e parlamentarizmit nën udhëheqjen e Vetëvendosjes, janë katër vitet më të dështuara fatkeqësisht për Kosovën dhe sot Kosova si rezultat i kësaj qeverisje gjindet në një situatë të sanksioneve ndërkombëtare dhe me një qeveri e cila nuk e ka as kontrollin e qeverisjes. Qeverisja e tyre bazohet mbi idetë e popullzimit dhe jo mbi idetë e qeverisjes efektive dhe demokratike”, ka thënë ai./teve1.info/
