Kryeredaktori i televizionit Tëvë1, Zijadin Gashi ka thënë se për nga pesha e historisë, raportimi në ditën e shpalljes së Pavarësisë së Kosovës, do të jetë një nga raportimet më të rëndësishme për të.
“Edhe për nga pesha e historisë do të jetë një nga raportimet më të rëndësishme edhe pse në punën gazetareske unë e shoh si një fillim të ri çdo ditë dhe çdo shkrim apo raportim e ka njëfarë rëndësie të vetën sepse ti nuk i bën ato për vetveten, por për një audiencë shumë më të gjerë”, ka deklaruar si në emisionin “1 Natë” në Tëvë1.
Gashi foli edhe për raportimet e gjatë kohës së luftës, e që tha se njëherë i thua vetës “më mirë mos të isha gazetar sesa që je”, por sipas tij, prapë nuk heq dorë sepse sheh e përjeton gjithçka.
“Kishte edhe momente të vështira në ditën kur përcollëm delegacionin tonë për në Rambuje, kur u shtymë nga policia në një qosh, ishte vështirë që edhe të merrnim informacione të sakta. Ka raportime që janë shumë më të ndjeshme, pastaj reportazhe të ndryshme prej viseve gjatë kohës së luftës, masakrave të ndryshme që shpesh i thua vetit më mirë mos të isha gazetar sesa që je, por prapë se prapë nuk heq dorë sepse sheh gjithçka dhe përjeton gjithçka”, shtoi ai.
Në fund, Gashi ka një mesazh për gjithë gazetarët.
“Mesazhi është që punën që e kanë marrë si gazetar, ta respektojnë dhe të jenë brenda atyre tri dritave sepse gazetaria është sikurse puna e semaforit, më mirë është që të punojnë në etikën kur e kemi të gjelbërten sesa në të kuqën apo në portokalli. Nëse arrijnë që me punën tonë të dëshmojmë diçka dhe të ndihmojmë diçka është më e rëndësishme sesa që të jemi më shumë atraktiv, sensacional apo të tjera”, përfundoi ai. /Teve1.info/
