Shefi i Grupit Parlamentar të LDK-së, Arben Gashi ka reaguar pasi kryeministri i Shqipërisë, Edi Rama ka thënë se i ka dërguar një Draft për Asociacionin në Paris dhe Berlin tek Macron e Scholz.
Gashi në një reagim në Facebook ka thënë se kompetent për propozimin e statutit të asociacionit, si dhe menaxhimin me partnerët ndërkombëtarë, është vetëm Qeveria e Kosovës, askush tjetër
“Të jemi të qartë e të saktë; kompetent për propozimin e statutit të asociacionit, si dhe menaxhimin me partnerët ndërkombëtarë, është vetëm Qeveria e Kosovës, askush tjetër, asnjë Qeveri e ndonjë vendi tjetër”, ka shkruar Gashi.
Rama ka thënë se një draft të Asociacionit të Komunave me shumicë serbe ia ka dorëzuar BE-së dhe ShBA-së.
Rama tha se ky draft është punuar nga disa ekspertë të huaj.
“Dje i kam përcjellë kancelarit Scholz dhe presidentit Macron një draft të Asociacionit. Për atë e kam vënë në dijeni dhe kryetarin e Këshillit Evropian Charles Michel dhe palën amerikane. Është një draft i punuar nga ekspertë të nivelit më të lartë amerikan dhe evropian prej kohësh, gjë që është bërë pikërisht në rast se do të vinte kjo ditë kur palët dhe në këtë rast për mua, i pakuptueshëm është pozicioni i Kosovës dhe jo i Serbisë, palët nuk po merren vesh as se kush duhet ta shkruajë këtë tekst, jo më se çfarë duhet të ketë teksti. Natyrisht që ky është një dokument konfidencial që pa diskutim nuk pretendon të jetë zgjidhja ideale por ju siguroj që është një dokument i nivelit më të lartë ndërkombëtar që merr në konsideratë të gjitha arsyet për krijimin e Asociacionit dhe merr në konsideratë që Asociacioni është pjesë e organizimit të jetës në Kosovë, duke adresuar të gjitha rekomandimet e Gjykatës Kushtetuese të Kosovës”, ka thënë Rama.
