Kandidati i Lidhjes Demokratike të Kosovës (LDK) për kryetar të Komunës së Obiliqit, Xhafer Gashi, ka prezantuar disa nga prioritetet e tij për mandatin e ardhshëm, duke përfshirë mbështetje për familjet e reja, investime në infrastrukturën shëndetësore dhe reformë në arsim.
Gashi ka theksuar se në sektorin e shëndetësisë do të vazhdohet me ndihmën për qytetarët që kanë nevojë për trajtim mjekësor, ndërsa ka premtuar edhe subvencione financiare për çdo lindje në komunë: 200 euro për lindjen e parë dhe të dytë, 300 euro për lindjen e tretë, si dhe 500 euro për lindjen e binjakëve.
Ai gjithashtu ka premtuar shërbime falas për Policinë dhe Forcën e Sigurisë së Kosovës (FSK), kontrolla sistematike për nxënësit në shkolla, kujdes për nënat shtatzëna dhe fëmijët deri në 3 vjeç, vizita mjekësore në shtëpi për sëmundje të rënda, analiza hormonale dhe ekzaminime me ultrazë dhe kontrolle falas me mamografi për gratë.
“Tek shëndetësia do të vazhdojmë, si deri më tani, me shpërndarjen e subvencioneve për ata që kanë nevojë. Do të ofrojmë shërbime cilësore publike dhe shërbime emergjente, kujdes paliativ për nënat shtatzëna dhe fëmijët deri në 3 vjeç. Kontrollat sistematike për nxënësit në shkolla do të vazhdojnë, po ashtu ofrimi i analizave hormonale dhe ultrazërit të arteries karotide. Meqenëse kemi mamografin, të gjitha kontrollet do të jenë falas. Për lindjen e parë dhe të dytë do të ketë subvencion 200 euro, për lindjen e tretë 300 euro, dhe për binjakët 500 euro. Do të vazhdojmë ndërtimin e katit të dytë dhe të tretë të Qendrës Kryesore të Mjekësisë Familjare (QKMF), do të ofrojmë shërbime falas për Policinë dhe FSK-në, si dhe shërbime sociale dhe familjare,” ka thënë ai në emisionin “Info Nata” në Tëvë1.
Ndërkaq, në fushën e arsimit, Gashi ka paralajmëruar fillimin e mësimit tërëditor në shkollat e Obiliqit, sipas modelit të Prishtinës.
“Ne planifikojmë që të fillojë edhe mësimi tërëditor, por paraprakisht duhet të përgatitet infrastruktura dhe duhet të ketë një marrëveshje apo duhet të jetë një projekt i përbashkët me Ministrinë e Arsimit, për shkak se ka nevojë të plotësohet edhe me norma të tjera. Unë besoj diku në vitin 2027 do të jemi të gatshëm për ta filluar këtë. Është modeli si i Prishtinës”, ka premtuar Gashi.
