Deputeti i Lidhjes Demokratike të Kosovës, Arben Gashi, ka folur para mediave pak para nisjes së seancës konstituive të Kuvendit.
Gashi është pyetur se si pret që të zhvillohet seanca, si dhe nëse LDK-ja ka një emër tjetër për postin e nënkryetarit dhe nëse do ta votojë kandidatin për këtë pozitë.
Ai ka thënë se këto pyetje duhet t’i drejtohen Lëvizjes Vetëvendosje, duke theksuar se propozimi i nënkryetarëve është kompetencë ekskluzive e partive politike.
“Krejt këto pyetje janë për VV-në. Unë vetëm një përgjigje e kam: tash po e kuptoni kush po e bllokon Kuvendin. Është e drejtë ekskluzive e partive politike për me propozu nënkryetarët e Kuvendit, s’ka diskrecion asnjë parti tjetër”, ka thënë Gashi.
Ai nuk ka dhënë detaje të tjera lidhur me qëndrimin e LDK-së për votimin e nënkryetarit.
