Anëtari i Kryesisë së Lidhjes Demokratike të Kosovës (LDK), Arben Gashi, ka theksuar se do të respektohet çdo rezultat që do të dalë nga votëbesimi në rast se kryetari aktual, Lumir Abdixhiku, e kërkon një gjë të tillë.
Para hyrjes në Kuvendin e LDK-së, Gashi ka shpjeguar se është në diskrecion të kryetarit të partisë të kërkojë votëbesim ose pushim për një periudhë të caktuar, duke shtuar se momentalisht nuk janë në fazën e kandidaturave të reja.
“Është në diskrecion të kryetarit të LDK-së a do votëbesim apo pushim për një kohë të caktuar. Nuk jemi në fazën e kandidaturave të tjera. Kemi të bëjmë me vlerësimin e punës së kryetarit aktual, të kërkuar nga vetë ai”, ka thënë Gashi.
Ai ka shtuar se Kuvendi i LDK-së duhet të shohë se çfarë do të ofrojë Abdixhiku, duke theksuar dy opsione të mundshme: dorëheqjen ose kërkesën për votëbesim.
“Nëse ofron dorëheqje, është akt vullnetar, i zbatueshëm dhe i pakthyeshëm. Nëse kërkon votëbesim, është çështje e votimit dhe duhet të mbahet votimi i fshehtë sipas statutit të LDK-së”, ka deklaruar Gashi.
Pavarësisht asaj që do të ndodhë në Kuvend, Gashi ka theksuar se LDK-ja do të ruajë unitetin e saj pas këtij procesi.
